spjallid.is

Sælir drengir og örfáu kvenkyns einstaklingar sem héldu að þetta væri eitthvað annað en feitt nördaspjall þegar þessi niðurstaða kom upp á Google...

Ég var að spá, hvað fá verðlöggurnar útúr því að verðlöggast?

Ég persónulega fæ einhvers konar vellíðunar tilfinningu við það að koma í veg fyrir að menn séu að reyna að misnota sér aðstöðu sína með því að setja of háa álagningu á hlutinn sem um ræðir og að láta einhvern sem lítið sem ekkert veit vita betur en að láta fara illa með sig!

Þetta er svoldið svona það sem ég ímynda mér að "Vigilantes" finna fyrir.

"Lean, mean, street justice!!"

Hvað færð þú hinsvegar útúr því?

Þessi spurning vaknaði í mér við það að vera að verðlögga einhvern commenta eyðara á Facebook alveg feitann...Notaður Ryzen 5 1600 series örgjörvi og 1050ti skjákort á 120.000kr? That don't sound right....

Hver ert þú að ákveða hvað er of há álagning? Eru lög varðandi endursöluverð á notuðum hlutum?

Ég er búinn að taka þennan slag nokkrum sinnum og er alveg til í smá meira. Þetta verðlöggudæmi er orðið að mínu mati algjört rugl þegar það er óumbeðið af seljanda. Mér er frjálst að biðja um það verð sem mér sýnist fyrir það sem ég á, og það er ljótt að skemma fyrir öðrum með því að skipta sér að þegar þú ert ekki sjálfur að hugsa um kaup. Þessar verðlöggur eru oftar en ekki að valda meira tjóni en heldur en hitt, þegar þær hafa rangt fyrir sér, sem gerist ansi oft. Þær snúa yfirleitt öllum söluþráðum sem þær snerta upp í neikvæða umræðu og eyðileggja allt fyrir öllum. Ef menn hafa þessa sjúklegu þörf til að skipta sér að verðlagningu annarra þá er eina rétta í stöðunni að senda seljanda prívat skilaboð og benda á þetta, allt annað er frekja og dónaskapur.

Góðir punktar.

En þannig að þú sérð ekkert að því þegar menn notfæra sér vanþekkingu annarra til þess að koma sér í gróða? Þegar Palli eyðir 300þúsund kallinum sem hann fékk í fermingargjöf á vél sem myndi kosta 200þús ný? Að bara því seljandi asnaðist til þess að kaupa OS hérna heima á 50þús, á meðan þú færð Win10 Pro 64bit á undir 350kr á eBay, þá ætti Palli litli að gjalda?

Æji ég skil þína punkta en finnst þetta samt nauðsynlegt þar sem á við!

HalistaX skrifaði:
Æji ég skil þína punkta en finnst þetta samt nauðsynlegt þar sem á við!

Þetta er einmitt málið sem Kiddi er að benda á, hver ert þú eða einhver annar að ákveða hvort það eigi við?
Þú ert augljóslega ekki að skilja puntana sem hann setti fram þó þú segir það miðað við þessi rök.

Á endanum snýst þetta alltaf um það hvað kaupandi er tilbúin að borga, þú sem seljandi verður að eiga það við þína sjúskuðu samvisku ef þér finnst það í lagi að taka fólk í anusinn.

Auðvitað finnst mér fullt að því að fólk sé að nýta sér vanþekkingu aðra, en minn punktur er að það er ekki þitt hlutverk að skipta þér að því, þar sem seljanda er frjálst að biðja um það verð sem honum sýnist. Eftirspurnin hefur lokaorðið um hvers virði eigur þínar eru, ekki einhver nörd með réttlætistilfinningu úti í bæ. Tala nú ekki um þegar verðlöggan fer með fleipur og eyðileggur söluna að algjörum óþarfa.

En eins og ég segi, ef menn bara verða að skipta sér af þá er hægt að senda einkaskilaboð á seljandann og benda á óeðlilega verðlagningu, og helst með rökstuðning t.d. hlekk á betri vöru á betra verði.

Ef seljandi biður um álit verðlöggunnar þá er það auðvitað bara besta mál og ég hef ekkert út á það að setja.

kiddi skrifaði:Mér er frjálst að biðja um það verð sem mér sýnist fyrir það sem ég á

satt, en mér er frjálst að benda á hvort að þú sért að vitna í dýrustu búðina, hreinlega að ljúga að fólki eða hvort sambærileg vara sé að fara ódýrara oftar en ekki.
Það er hinsvegar undir þér komið hvort þú takir mark á þessum commentum eða ekki.
Ef þú setur eitthvað verð á vöruna og einhver vill borga það, þá sé ég ekkert að því og ég er nokkuð viss um að það væru ekki verðlöggu comment sem eyðileggja söluna, heldur er það viðbrögð seljanda sem eru frekar að eyðileggja söluna. Það vill enginn díla við over-reacting asna.
Það á ekki að banna verðlöggur bara af því að þú getur ekki höndlað commentin.

edit: en auðvitað geta verðlöggurnar líka verið over-reacting asnar sem mættu alveg orða póstana sína betur

Það er stór munur á því að segja "ég er með örgjörva sem kostar nýr 90k, (þegar hann kostar í raun 50k) og ég vil fá 40k fyrir hann, eða segja ég er með örgjörva sem kostar nýr 50k og ég vil fá 40k fyrir hann. Sjálfsagt að benda á þegar fólk er að svíkja og pretta og fara með rangt mál en ef menn verðleggja of hátt þá yfirleitt sitja menn uppi með hlutinn.

Jú ég skildi það alveg srm Kiddi hafði að segja, ég var bara ekki sammála því.

En það er svo sem alveg satt þetta með "Hver er ég að skipta mér af? Er ég einhver álagningar guð?" "Hvaða rétt hef ég?"

Ég skil þetta mæta vel. Mér finnst bara ógéðslegt, siðferðislega, að misnota aðstöðu sína sem seljandi og ætlast til þess að fá fúlgur fjár fyrir eitthvað ryð rusl sem kötturinn gerir ekki annað en að míga á....

Því stór partur þeirra sem eru að versla sér notaðar vélar á netinu eru bara ekki jafn lang sokknir í þessa dýflissu Mt. Dew drykkju og Doritos áts og við hinir...

Það liggur við að ég tárist þegar ég sé að einhver láti blekkja sig af orðum lygara og loddara.

En maður verður að viðurkenna að verðlögg kemur oft út eins og argasti dónaskapur og vanvirðing... Maður sér það oft, því miður...

kiddi skrifaði:Þetta verðlöggudæmi er orðið að mínu mati algjört rugl þegar það er óumbeðið af seljanda. Mér er frjálst að biðja um það verð sem mér sýnist fyrir það sem ég á, og það er ljótt að skemma fyrir öðrum með því að skipta sér að þegar þú ert ekki sjálfur að hugsa um kaup.

Þetta snýst ekki um ,,að skemma fyrir öðrum". Finnst þér t.d. neytendasamtökin vera ,,að skemma fyrir öðrum" þegar þeir skipta sér að viðskiptafyrirkomulagi? Athugasemdir á verðlagningu í söluþráðum eru ekki beindar til seljanda, það getur enginn þvingað annan til að selja á verði sem hann er ekki tilbúinn til að sætta sig við. Þeim er bennt til tilvonandi kaupenda svo að þeir hafi meiri upplýsingar um hvert hugsanlega sé raunverulegt verðgildi vörunnar. Ef einhver er að selja tölvu með Intel i5 750 og GeForce GTX 460 á 120 þúsund þá finnst mér ekki nema rétt að allir neytendur sem sjá þá auglýsingu fái að vita að þeir geta fengið miklu betri tölvu fyrir sama verð.

kiddi skrifaði:Eftirspurnin hefur lokaorðið um hvers virði eigur þínar eru,

Það að eftirspurn og framboð ráði verði virkar bara ef allir aðilar eru fullkomlega meðvitaðir um alla þætti og hliðar markaðarins. En það er einmitt ástæðan fyrir því að fólk gerir athugasemdir um verðlagningu, vegna þess að þeir trúa því að sumir þeirra sem lesa auglýsinguna séu ekki meðvitaðir um alla þessa þætti, og gætu haft gagn af meiri upplýsingum.

Ég átti þátt í að stofna vaktin.is fyrir 16 árum síðan og orðin "VARÚÐ: Verðlöggur" sem standa í lýsingu "Til Sölu / Óskast keypt" flokksins hér voru skrifuð af mínum fingrum á mínu lyklaborði, en síðan þá hefur margt vatn runnið til sjávar og mér er orðið ljóst að verðlöggur, oftar en ekki, hafa meiriháttar skaðleg áhrif á bæði sölur og samfélagið, þar sem þær nánast undantekningalaust snúa öllu upp í neikvæða umræðu. Þetta tíðkast hvergi annarsstaðar, og á spjallborðum erlendis tíðkast víða blátt bann ef þú drullar yfir sölur annarra óumbeðinn.

Hvað sem þið segið, þá breytir það engu að réttur seljanda til að ákveða verð á sínar eigur er algjörlega þeirra og engra annarra. Ef illa upplýstur kaupandi endar á að borga mikið þá er það honum einum að kenna, ekki ykkar sem sátuð hjá og horfðuð á. Það er ekki heimsendir. Fólk borgar of mikið fyrir hitt og þetta, allan daginn, alla daga, allsstaðar. Ég er ekki stjórnandi hér lengur af þeirri ástæðu að mig langar að geta sagt skoðanir mínar algjörlega skuldlaust og ég geri mér grein fyrir því að meirihlutinn hér er samþykkur verðlöggum, ég er samt hundrað prósent sannfærður eftir öll þessi ár að fylgjast með söluborðinu hér, að óumbeðnar verðlöggur valda meira tjóni en þær gera gagn, því þær fara oft mjög ljóta leið að því að verðlöggast, t.d. með órökstyddu og jafnvel dónalegu máli.

Þetta er svolítill línudans. Seljandi vill fá sem mest fyrir dótið en kaupandi að borga sem minnst.

Finnst sjálfsagt að gefa upplýsingar ef viðkomandi oskar eftir aðstoð með verðlagningu.

Einnig þegar seljandi er vísvitandi að halda fram einhverju sem stemmir ekki og er með þvílíkar fullyrðingar.
Þá er betra að viðkomandi sé með sínar grillur um ágæti búnaðar og verðhugmyndir á bland.

Það að senda viðkomandi upplýsingar í pm að einhvað hjá honum vegna verðlagningar, virkar ekki. Að setja það í þráðinn virkar því þá sjá allir hvað er rangt og geta myndað sér skoðun samkvæmt því.

Mín reynsla af kaupum á búnaði hérna og að fylgjast með söluþráðum er sú að þegar verðlagning er sanngjörn þá seljast hlutirnir tiltölulega hratt.

Tbot skrifaði:Mín reynsla af kaupum á búnaði hérna og að fylgjast með söluþráðum er sú að þegar verðlagning er sanngjörn þá seljast hlutirnir tiltölulega hratt.

Eureka! Ergo: hlutir sem eru verðlagðir of hátt seljast hægt og illa. Það er algjör óþarfi að skipta sér að, sérstaklega hér á vaktin.is þar sem meginþorri notenda er vel upplýstur og með gott verðskyn.

kiddi skrifaði:Hvað sem þið segið, þá breytir það engu að réttur seljanda til að ákveða verð á sínar eigur er algjörlega þeirra og engra annarra. Ef illa upplýstur kaupandi endar á að borga mikið þá er það honum einum að kenna, ekki ykkar sem sátuð hjá og horfðuð á. Það er ekki heimsendir. Fólk borgar of mikið fyrir hitt og þetta, allan daginn, alla daga, allsstaðar.

Þetta er gríðarlega góð lýsing á bland.

Það sem mér hefur alltaf fundist með vaktina er að hérna eru aðilar sem reyna að upplýsa um svik og pretti.
Því ef báðir aðilar eru upplýstir er jafnræði með báðum og "sanngjarnt" verð fæst fyrir báða aðila.

Miðað við þetta komment þá finnst þér sjálfsagt að fólk sé féflétt og viðkomandi aðilar eigi að komast upp með það athugasemdalaust.

Hvað sem gerist annars staðar þarf ekki að vera rétt/réttlátt og gerir það ekki að sjálfsögðum hlut sem á þá að viðgangast.

Held að verðlöggur séu líka að huga að sínum hagsmunum. mér finnst ég allavega verða var við að seljendur eða kaupendur vitni í fyrri söluþræði til að finna gangverðið á vörunni. Endanlegt söluverð kemur oft ekki fram í söluþráðum, ég hef oft endað með að kaupa vöru nýja vegna þess að seljendur eru með óraunhæfar kröfur.

Annars finnst mér persónulega mest pirrandi á þessari síðu aðilarnir sem bjóða alltaf langt undir raunhæfu verði t.d 120k í 500k vöru. Það eru leiðinlega margir hérna sem ég svara ekki einusinni skilaboðum frá ef ég er að selja og mér dettur ekki í hug að versla af sömu aðilum

kiddi skrifaði:

Tbot skrifaði:Mín reynsla af kaupum á búnaði hérna og að fylgjast með söluþráðum er sú að þegar verðlagning er sanngjörn þá seljast hlutirnir tiltölulega hratt.

Eureka! Ergo: hlutir sem eru verðlagðir of hátt seljast hægt og illa. Það er algjör óþarfi að skipta sér að, sérstaklega hér á vaktin.is þar sem meginþorri notenda er vel upplýstur og með gott verðskyn.

Þarna gerir þú ein grundvallarmistök að áætla að meginþorri sé vel upplýstur.
Við höfum ekki hugmynd um það.

Ég gaf þetta bara út frá minni hlið, því ég hef fyrir því að kynna mér verð á viðkomandi hlutum sem ég ætla að kaupa og hvað ég er tilbúinn að borga fyrir þá.

Þetta er ekki sjálfgefið fyrir nýliða á vaktinni og fólk almennt því tæknikunnátta er mismunandi.

Seljendur: Ekki vera bjáni. Kynntu þér hlutinn sem þú ert að selja. Verðsettu hann rétt, þetta er ekki flókin stærðfræði.

Kaupendur: Vertu vel upplýstur um hlutinn sem þú ert að kaupa. Gerðu verðsamanburð á notaða hlutnum og verðum hérlendis og erlendis. Er aðilinn að selja hlutinn of hátt? Sendu honum skilaboð og spurðu hann nánar úti í verðið og hlutinn. Gefðu honum svo sanngjart tilboð. Hann þarf samt ekki að taka því.

Verðlöggur: Ekki vera hrokafullt fífl (eins og ég núna). Ef þú ætlar að gera athugasemd á verð seljanda vertu þá með hlutina 100% á hreinu. Seljendum er drullusama um þitt "viðskiptasens". Vertu kurteis og vinalegur, það nær alltaf lengra en hroki og leiðindi.

Þetta finnst mér ekkert sérlega flókið

kiddi skrifaði:Hvað sem þið segið, þá breytir það engu að réttur seljanda til að ákveða verð á sínar eigur er algjörlega þeirra og engra annarra.

Nú, hvað sagði ég annað en ,,það getur enginn þvingað annan til að selja á verði sem hann er ekki tilbúinn til að sætta sig við"? Það hefur bókstaflega enginn í þessum þræði haldið öðru fram en að hver sem er megi ekki setja hvaða verð sem honum sýnist á þá vöru sem hann er að selja. Notendur geta svo gert athugasemndir á verðlagningu sem eru sýnilegar neytendum.

Persónulega finnst mér mjög gott að selja á Vaktinni því maður getur séð á athugasemdum hvort verðlagning hjá manni var rétt eða ekki. Þegar ég sel hluti þá er það vegna þess að ég hef ekki not fyrir þá lengur og vil bara losna við þá, en vill þó fá sanngjarnt verð fyrir. Ef ætlunin er að braska eru til aðrar vefsíður til þess (bland, ebay, etc.).

Mér finnst verðlöggur mikilvægur hluti af vaktinni, stundum eins og það sé það eina sem aðskilur vaktina frá FB og Bland. Upp á síðkastið hef ég séð ákveðna notendur dúkka upp með töluvert marga kaup- og söluþræði (á sömu hlutunum, endursala) og fara með mjög rangt mál í sínum þráðum - í þeim tilfellum hef ég látið vita óumbeðinn. Fæ þó ekkert eitthvað sérstaklega út úr því.
Ég hef sjálfur alltaf reynt að verðleggja hluti sanngjarnt, eða á verði sem ég væri amk. til í að borga fyrir hlutinn og hafa mínar sölur gengið mjög vel hér. Einnig kaupi ég bara hluti sem eru rétt verðlagðir og borga þá frekar uppsett verð en að standa í prútti.

Dónaskapurinn og hrokinn er meira vandamál hér finnst mér, bæði hjá verðlöggum og öðrum, mér finnst þetta meira atriði um að vera kurteis og koma vel fram.

Ég fór einu sinni í svona sérverslun með gluggatjöld. Vildi fá að vita hvað hlutirnir kostuðu. Manneskjan spurði mig hvað ég vildi og sagði svona c.a. hvað þetta væri mikið, hún kíkti í tölvuna hjá sér og skrifaði einhverjar tölur niður á blað og rétti mér.

Ahhh sagði ég. "Má ég kannski fá útprentaðan verðlistann svo ég geti íhugað mismunandi vörur og í hvað marga glugga ég vil kaupa".
Konan hvæsti á mig, "Hva!! helduru að ég vilji að samkeppnin komist yfir þetta????"

Ísland.


Leyndarhyggjan yfir verðum er rosaleg sumsstaðar. Ýmis fyrirtæki vilja ekki samkeppni og gefa því ekki upp verð opinberlega, bara í 1 on 1 við viðskiptavini.

Verð eiga að vera uppi á borðum, auglýst, og ekkert leyndó.

Þetta er það sem vaktin snýst um, að sýna verð. Áður fyrr þurfti að downloada excel skjölum frá verslunum, og sumar voru ekki að sýna þetta.

en svona þegar allt er á botninn snúið, er Vaktin.is ekki verðlögga?
það er ekki svo langt síðan að einhver eigandi tölvuverslunar var að kvarta yfir því að vaktin sé að bera saman verð og það komi niður á honum?

HALLÓ! Það er heili galdurinn með vaktinni að menn geti treyst því að sanngjarnt verð fáist, fyrir bæði seljanda og kaupanda.
Hvað er að því að benda fólki á það að þeir séu með of hátt verð?
Auðvitað þarf að gera það kurteisilega og oft hef ég séð seljanda taka vel í það þar sem þeir hefðu kannski ekki áttað sig á því að varan væri ný búinn að lækka mikið í verði. En aftur á móti eru líka seljendur sem vita að þeir séu að okra og fara straks í mikla vörn.
Hef ekki tölu á því hvað ég er búinn að "converta" mörgum í vaktara einmitt útaf því að ég get treyst því að verðlöggur passi að allir fái "fair deal".
Ef allir okrarar féngu að vaða uppi óáreittir á sölutorginnu hér þá væri enginn tilgangur að velja vaktinna til að kaupa fram yfir t.d. facebook.
Í mínum huga þá er ekkert "verðlöggur afþakkaðar"
Hefur einhvern tímann verið áhugi hér fyrir uppboðsþræði? Gæti verið með falda lágmarks upphæð og engin koment. Þá væri raunverulega framboð og eftirspurn sum mundi ráða verðinu.

Verðlöggur eru aðal ástæðan fyrir að maður vísar vinum og kunningjum hiklaust hingað inn. Fólki vantar oft að kaupa eitthvað sem þau hafa ekki vit á. (Og maður nennir ómögulega að skipta sér mikið af)

Amma keypti sér Kínverska spjaldtölvu á Kanarí fyrir 50.000 kr. sem er svo hæg, mikið rusl og full af bloatware að maður rífur af sér hárið eftir 2 mínútur.

Guð hvað ég hefði verið þakklátur fyrir verðlöggur í þeirri ferð.

Mér finnst verðlöggur annarstaðar en hérna alveg gersamlega út í hött.

En þar sem að tilgangur verðvaktarinnar og upprunalegur tilgangur síðunnar er að vera verðlögga, þá finnst mér þær allt í góðu lagi hérna.

Sallarólegur skrifaði:Amma keypti sér Kínverska spjaldtölvu á Kanarí fyrir 50.000 kr. sem er svo hæg, mikið rusl og full af bloatware að maður rífur af sér hárið eftir 2 mínútur.

Guð hvað ég hefði verið þakklátur fyrir verðlöggur í þeirri ferð.

Ekki sú fyrsta sem er svikin á Kanarí, ég tók einmitt við einni svona spjaldtölvu fyrir ca 2 árum og hún var með 16 core í about this computer og ekkert hægt að uppfæra eða reseta Greyið konan var tæplega 300 þúsund króna fátækarir eftir þessa búðarferð. Kortafyrirtækið var bara með stæla.